Med knapt fleirtal vedtok kommunestyret i Jondal i Hordaland at kommunen skal slå seg saman med Ullensvang og Odda.
Ni representantar frå Ap, KrF og Høgre stemte for, medan åtte representantar frå Senterpartiet stemte mot, melder Bergens Tidende.
Kommunereforma skapte drama i kommunen ved Hardangerfjorden med omtrent 1.100 innbyggjarar. Då vedtaket skulle fattast i juni, sat éin kommunepolitikar fast i Nordsjøen, og vararepresentanten braut med partiet sitt. Kommunestyret stemte då overraskande imot samanslåing.
Onsdag blei det heldt ekstraordinært kommunestyremøte der saka blei teken opp igjen. Leiaren av kommunalkomiteen på Stortinget, Helge André Njåstad, seier dette er eit fornuftig og framtidsretta vedtak.
– Sidan den nye kommunen blir over 9.000 innbyggjarar, vil den nye kommunen få regionsentertilskot allereie frå 2017. Dette viser at kommunereforma rullar vidare og at det er mogleg å gjere lokale vedtak innan utløpet av fristen 31. desember.
Den nye kommunen skal heite Ullensvang. Dei to andre kommunane har tidlegare vedteke samanslåing. (©NPK)
