Målungdommen meiner TV2 diskriminerer hardangerdialekta.
«Kjendis-Farmen» er sett saman av 12 deltakarar, alle med kvar sine dialektar frå fleire stader i landet. Likevel er det berre Leif-Einar Lothe som er teksta i programmet.
Fleire sjåarar har uttrykt frustrasjonen sin rundt tekstinga av «Lothepus» gjennom sosiale medium.
– Vi meiner TV 2 her viser språkhaldningar som eit av landets største mediehus burde halde seg for gode for. Ved å teksta berre éi spesifikk dialekt set ein nokre dialektar over andre, der nokre er «normalen» samanlikna med dei andre. Ikkje greitt! skriv Norsk Målungdom i ei Facebook-melding.
LES OGSÅ: Fleire skriv dialekt
TV: – Me tar omsyn
Presseansvarlig for «Kjendis-Farmen», Alex Iversen, fortel dette til Dagbladet om kvifor TV 2 har valt å teksta berre éin av deltakarane.
– Det er nokre sjåarar, spesielt i det sentrale austlandsområdet, som har litt vanskeleg for å forstå kva folk frå enkelte delar av landet seier når dei snakkar dialekt. Det har me tatt omsyn til det når det gjeld Leif Einar Lothe, svarar Iversen.
LES OGSÅ: Bruk av dialekt minst akseptert i Oslo
Målungdommen: – Mangel på kunnskap
Målungdommen er ikkje nøgd med svaret:
– Me meiner dette vitnar om både særs låge forventingar til eigne sjåarar, og mangel på kunnskap om språk. Difor seier me: Tekst alle eller ingen! skriv Målungdommen.
Synnøve Marie Sætre, leiar i Norsk Målungdom, seier til Framtida.no at det ikkje handlar om evne til forstå dialekta, men heller om manglande vilje til å forstå.
LES OGSÅ: Dette er landets verste dialekt
