Statssekretær Grunde Kreken Almeland (V) seier det er viktig at barnehagane tar ansvar for å lesa og synga også på nynorsk og dialekt, særleg i barnehagar som har nynorsk som hovudmål.
Nynorske barnehagar syng og les meir på bokmål enn nynorsk, viser ei ny undersøking frå Pirion og LNK.
Pirion har sendt spørsmål til den politiske leiinga i Kunnskapsdepartementet om kva dei tenkjer om dette. Statssekretær Grunde Kreken Almeland (V) svarar det er viktig at barn møter eit mangfald av språk i barnehagen, og at dei møter språk på ein naturleg måte.
– Å synga songar på nynorsk, bokmål, dialekter og på andre språk, er ein eigna og naturleg måte å møta språk på. Derfor er eg glad for at språk og kommunikasjon har ein svært sentral plass i rammeplan for barnehagen, skriv han i ein epost til Pirion.
– Barna skal få god språkstimulering
Statssekretæren viser til at rammeplanen legg vekt på at personalet skal anerkjenna barna sine ulike uttrykk for kommunikasjon og språk, og at barna skal få god språkstimulering.
– Barna i barnehagen skal òg møta ulike språk, språkformer og dialektar gjennom rim, reglar, songar, litteratur og tekstar frå samtid og fortid. Her er det viktig at barnehagane tar ansvar for å lesa og synga også på nynorsk og dialekt, særleg i barnehagar som har nynorsk som hovudmål, understrekar han.
LES OGSÅ: Noregs Mållag om bokmål i barnehagane: – Problematisk
– Barnehageeigarane har ansvaret
– Kva vil regjeringa gjera for at fleire barn som seinare skal starta på skular med nynorsk som opplæringsmål, skal få møta meir nynorsk i barnehagen?
– Rammeplanen seier at barnehagen skal bidra til at barn leiker med språk, symbol og tekst og stimulera til språkleg nysgjerrigheit, medvit og utvikling. Det er barnehageeigarane sitt ansvar å sørga for at deira barnehagar følgjer rammeplanen, slår Grunde Kreken Almeland fast.
– Nynorsksenteret har, som me ser i artikkelen om undersøkinga, tips og ressursar som kan stimulera til utforsking av språket. I nettressursen Språkløyper ligg det òg gode idear til korleis barnehagar kan arbeida med språk. I tillegg finn ein her lister over gode barnebøker på nynorsk, påpeikar han.
Fredar rammeplanen
– Rammeplanen for barnehagen nemner ikkje nynorsk med eitt ord. Professor Eli Bjørhusdal ved HVL seier at rammeplanen og barnehagelova må tematisera nynorsk og ta inn i seg formuleringar om at barn som skal møta nynorsk i skulen òg må møta nynorsk i barnehagen. Er det aktuelt for regjeringa å gjera noko med dette?
– Nei, det er det ikkje. Nynorsk er eit skriftspråk, og skriveopplæring er ikkje ei oppgåve for barnehagen. Derfor omtalar ikkje rammeplanen nynorsk eller bokmål. Men rammeplanen seier at personalet skal støtta leiken til barna med mellom anna utforsking av skriftspråket, avsluttar statssekretær Grunde Kreken Almeland (V).
LES OGSÅ: Knyter språk og identitet saman i barnehagen: – Nynorsk gjennomsyrar alt
