Oppropet frå 50 ordførarar som ønskjer at innvandrarar må få norskopplæring på nynorsk har no hamna i rett departement.
Anne Margrethe Eidhammer frå Vindafjord har no fått svar frå Kunnskapsdepartementet på oppropet der 50 ordførarar frå ulike nynorskkommunar har skrive under på eit krav for å få undervisningsmateriell for framandspråklege på nynorsk. Departementet svarte med å takke for brevet og la vekt på at dette var noko dei ville ta med seg vidare i arbeidet. Noko som skuffa Eidhammer.
– Ja, dette er tannlaust. Det er ikkje eit svar, men berre ei registrering av at dei har lest brevet, seier ho til lokalavisa Grannar.
No beklagar departementet svaret og viser til at brevet høyrer heime i Barne – og likestillingsdepartementet.
– Eg skjønar godt at ho er misnøgd med svaret, og me burde ha opplyst at dette ikkje var heilt vårt ansvarsområde, seier statssekretær Lisbeth Rugtvedt (SV) til Bergens Tidende.
