Diktarvegen er ein mulegheit for kommunane langs indre stamveg til å vise seg fram, meiner samferdsleminister Magnhild Meltveit Kleppa (Sp).
– Diktarvegen kan gi fleire høve til å realisere draumar og nye verksemder kan gro fram. Den kan bli eit middel for å nå andre mål, sa samferdsleministeren under opninga av konferansen Vegen vidare som opna i Balestrand i dag.
I ein slik samanheng blir trygge og gode samferdsleårer på Vestlandet er avgjerande, seier samferdsleministeren.
Vegane på Vestlandet er ei utfordring. Heile 43 prosent av den nasjonale eksporten føregår på Vestlandet, sjølv om berre 25 prosent av det totale folketalet bur her. Indre stamveg er like viktig som ytre stamveg, men den indre vegen står overfor heilt andre utfordringar, seier Kleppa.
– I den ytre stamvegen er det og andre krefter enn politikken som er naturlege pådrivarar. Derfor er det ekstra viktig å gjere indre stamveg sterkare.
Rassikring av vesentlege strekningar langs rv 13 som Oddadalen og Tysdalsvatnet er avgjerande for at folk skal få ein trygg kvardag og for at samfunnet skal spare kostnadene stengte vegar medfører, påpeiker samferdfsleministeren. Nasjonal Transportplan legg opp til å bruke 1 milliard årleg til rassikring, og totalt 332 milliardar til samferdsle dei neste ti åra.
– Målet er sjølvsagt å få mest muleg veg og rassikring for pengane, og vi vil invitere ulike miljø med på å drøfte kva pengane skal brukast til og kor det kan vere meir å hente.
