– Når Jon Fosses teaterstykke nesten ikkje er spelte på teatra frå Trondheim og nordover er dette etter mi meining først og fremst av språklege og språkpolitiske grunnar, seier dramaturg Ola E. Bø ved Det Norskte Teatret til scenekunst.no.
Ved Trøndelag Teater er nynorskredsla ekstra stor, meiner Bø. Han har gått gjennom repertoaret ved regionteatra frå Trondheim og nordover og fann ut at berre eitt stykke av Jon Fosse, Draum om hausten, vart spelt på Trøndelag Teater i 2011. Verken Nordland Teater eller Hålogaland teater har spelt noko av den kjende norske dramatikaren, skriv scenekunst.no.
– Når Jon Fosse ikkje har fått det gjennomslaget i sitt eige heimland som han har fått ute i Europa er det fordi han skriv på eit offisielt mindretals-språk som det i norsk teater finst ein lang og seig tradisjon med fordommar mot, seier Bø.
– No har Trondheim fostra ein ny, stor forteljar og dramatikar som skriv på nynorsk, Carl Frode Tiller. Han blir beden av teatret å levere tekstane sine på bokmål. Sikkert ikkje noko stor sak for han, men… Er det Trondheims-publikummet som skal beskyttast mot sine fordommar? I så fall er det teatrets oppgåve å utfordre, ikkje å legge seg flat, skreiv Bø i eit føredrag for Norsk Teaterlederforum sist haust.
