Liv Marie Schou ved St. Hallvard videregående skole i Lier meiner sosiale medium som Facebook er avgjerande for å lære elevane nynorsk.
Ho har gode erfaringar av å la elevane nytte Facebook i norsk-timane.
– Elevane skreiv meldingar, chatta og skreiv på veggen til kvarandre; på nynorsk. I staden for å stengje dei sosiale media ute frå undervisninga, er dei opne på skulen vår. Det er ei utfordring å gjere nynorskundervisninga interessant for sidemålselevar som ikkje ser nytten i faget, skriv ho i eit lesarbrev i Dagbladet.
– La oss gripe tak i elevane der dei er for å nå dette målet. Det kan vere måten å få opp augo for nynorsken på, mange nyttar dialekten sin når dei skriv i dei sosiale media, og da er ikkje vegen lang tilå sjå nytten av nynorsk; dialekt og nynorsk heng tett i hop. Å stengje Facebook ute frå undervisninga i skulen er difor meir bakstrevarsk enn det negative synet mange har på nynorsk, skriv ho vidare.
