Ei ny løyving på 47 millionar kroner skal hjelpa norske bygder å trekkja til seg nye innbyggjarar. Prosjekt som legg til rette for innvandrarar blir spesielt prioritert.
God respons på løyvinga i fjor har ført til at løyvinga i år er auka 15 millionar kroner.
Ei evaluering av den nasjonale satsinga på småsamfunn syner at slike løyvingar verkar, meiner kommunal- og regionaldepartementet.
– Både småsamfunnssatsinga og bulyst synet det store mangfaldet som finst av aktive og engasjerte folk i Noreg som har eit stort hjarta for lokalsamfunna sine. Eg er difor glad for at eg kan vera med å leggja til rette for at det skjer så mykje positivt i norske bygder, seier kommunal- og regionalminister Liv Signe Navarsete.
I den nye utlysinga blir det spesielt fokusert på prosjekt som legg til rette for å integrera innvandrarar i distriktet.
– Vi ser at mykje av folkeveksten i Noreg kjem frå innvandring frå utlandet. Det er viktig at alle kjenner seg velkomne, og at dei blir godt integrerte i dei lokalsamfunna dei kjem til. Vi treng fleire hender og flinke folk i åra framover, og for mange bygdesamfunn kan nye tilflyttarar vera ein positiv tilvekst, seier Navarsete. (NPK)
