Kulturdepartementet leitar framleis etter ny direktør til Språkrådet. No utset dei søknadsfristen.
Den siste søknadsfristen var 21. januar, no utset Kulturdepartementet fristen på nytt til 15. februar. Difor har departementet inga søkjarliste å leggje fram no, skriv Nationen.
Prosessen med å tilsetje ny direktør i Språkrådet etter Sylfest Lomheim har no pågått i over eit år, utan resultat. I fjor trekte derimot fire styremedlemmer seg i protest mot at departementet ikkje ville lytte til styret sitt råd.
– Dei rundane er me heilt ferdige med. No har me eit nytt styre og skal tilsetje rett person til ei veldig viktig stilling. Me ønskjer oss den beste. Det er difor det har tatt så lang tid. Eg føler meg sikker på at me skal kome i mål no, seier kulturminister Anniken Huitfeldt (Ap) til Nationen.
