Noregs største nynorskkommune har meldt seg inn i Landssamanslutninga av nynorskkommunar.
– Det er naturleg å gå inn i ein fellesskap med andre nynorskkommunar, seier Ålesund-ordførar Eva Vinje Aurdal (Ap), og legg til:
– For oss handlar det no om nynorsken sine kår for framtida, og at vi tar den kampen nasjonalt. Eg trur det vi har gjort i Ålesund kan vera eit steg vidare i den kampen.
Etter at kommunestyret i Ålesund vedtok å gjera kommunen til ein nynorskkommune, må no statlege organ skriva til kommunen på nynorsk.
Eva Vinje Aurdal håpar òg at LNK kan vera vegvisarar på både teknologifronten og når det gjeld arbeidsmetodar, og gje gode idear og motivasjon til å koma seg vidare i språkarbeidet.
– Ikkje heilt smertefritt
Det har vore stor diskusjon om språket i den no litt over eitt år gamle storkommunen på Sunnmøre. Ordføraren vedgår at det ikkje har gått heilt smertefritt for seg, og nokre tilsette i den gamle bokmålskommunen Ålesund har argumentert med at det er vanskeleg å læra seg nynorsk og at folk ville slutta.
– Då er det viktig at vi har gode støttetilbod og opplæring, seier ordføraren.
Alle medlemskommunane til LNK får nynorskkurset På sakslista gratis, og Ålesund får no tilbod om dette.
Språkbruksplan
Ålesund kommunestyre har fått ros for språkbruksplanen som kommunen vedtok i desember. Eva Vinje Aurdal seier det ligg fleire tiltak enn nynorsk i planen.– Det handlar også om klarspråk og at vi skal kommunisera meir forståeleg. understrekar ho.Kommunen skal òg laga ein plan for språkopplæring i skular og barnehagar.
No framover handlar det òg å skaffa seg programvare og verktøy som skal hjelpa kommunen til å bli ein god nynorskkommune.
– Velkommen
Dagleg leiar i LNK, Vidar Høviskeland, er strålande nøgd med at Ålesund kommune no melder seg i inn i organisasjonen.
– Vi helsar Ålesund kommune velkommen som medlem i LNK. Det er viktig at nynorskkommunane står samla for å skapa positive haldningar til nynorsk språk og kultur, og at vi samstundes passar på at statlege styresmakter bidreg til å gjera det lettare å vera nynorskbrukar. Med den største nynorskkommunen som medlem står vi endå sterkare.
