Klima- og miljøminister Tine Sundtoft gratulerer Austrheim kyst- og sogelag med prisen for det beste arrangementet i samanheng med kulturminnedagane som går av stabelen no. Temaet i år er “Nabolag”.
Austrheim kyst- og sogelag har laga eit spanande opplegg: “Austrheim frå steinalder til oljealder”. Arrangementet er resultatet av eit godt, lokalt samarbeid. Det byr på eit variert program som vil gje lokalbefolkninga sjansen til å verta betra kjent med den lokale historia.
Austrheim kyst- og sogelag har markert kulturminnedagane i ei årrekkje. Laget utmerkar seg i år med å fokusera på den lokale historia gjennom tre arrangement:
– Vandring på steinalderstiane og forteljingar om funn frå området rundt Fosnstraumen
– Besøk til Statoil Mongstad-museet
– Båttur til Børilden med besøk til ein nedlagd frukt- og bærhage, ei gravrøys frå jernalderen og historier om livet på Børilden før fråflyttinga på 1990-talet
Kulturminnedagane skal bidra til å skapa forståing og interesse for kulturminne og kulturmiljø blant folk. Dagane vert arrangerte kvara år over heile Europa. I år vert dagane markerte på over 200 stader over heile landa.
– Kulturminnedagane er flotte arrangement, og eg vil nytta høvet til å takka alle dei frivillige som står bak. Eg er imponert over mangfaldet desse dagane kan visa fram! Difor vil eg oppmoda alle til å koma seg ut, finna fram til *ein av desse stadane og oppleva den fantastiske innsatsen dei mange frivillige gjer for å ta vare på kulturarven vår, seier Sundtoft.
