Kommunane ber om minst 5,5 milliardar kroner i frie midlar i 2011. KS meiner dette er nødvendig for å halde oppe dagens tilbod til befolkninga.
Regjeringa legg fram forslaget sitt til kommuneøkonomi samtidig med revidert nasjonalbudsjett 11. mai.
Interesseorganisasjonen til kommunane, KS, meiner denne summen er nødvendig for å halde oppe nivået på eldreomsorg, oppussing av skuler, sjukeheimar og kyrkjer, vedlikehald av vegar og av avgrensing av gjeldsveksten i kommunane.
Fredag skal KS ha det siste konsultasjonsmøtet med regjeringa før kommuneøkonomiproposisjonen blir lagt fram.
– For lite
Men 5,5 milliardar er ifølgje KS-leiar Halvdan Skard ikkje nok for å innfri krava om auka innsats i barnevernet, fleire lærarar og full sjukeheimsdekking.
– Dersom regjeringa ønskjer at kommunesektoren skal gjera dette, må ho stille ressursar til rådvelde, slår han fast.
Skard understrekar at 5,5 milliardar kroner er eit minimumsbeløp for å halde standardane ved lag og for å starte nokre «ta-igjen-øvingar».
– Det skulle vore mykje meir. Det reelle behovet er langt større, men vi ber om det vi meiner er realistisk. Kommuneøkonomien, som utgjer 20 prosent av norsk økonomi, må også ta følgjene av innstrammingspolitikken til regjeringa. Vi har teke inn over oss at vi er ein del av norsk økonomi, og at vi må leva med det på godt og vondt, seier KS-leiaren. (NPK)
