Ulvik poesifestival går av stabelen 5.– 7. september. På programmet står allereie fleire kjende namn.
Både Brageprisvinnaren Ruth Lillegraven, Stein Torleif Bjella, Frode Grytten og Øyvind Rimbereid kjem til Ulvik poesifestival inst inn i Hardangerfjorden i september.
I år er temaet for festivalen «Grøn poesi», og frå no av er det Nynorsk kultursentrum som står som arrangør. Festivalen tek til dagen etter den offisielle opninga av Olav H. Hauge-senteret.
– Samtidspoetane er på veg mot eit sjølvkritisk oppgjer med litteraturens plassering av mennesket i naturen. Med temaet «Grøn poesi» vil Ulvik poesifestival visa ei dikting som vågar å engasjera og utfordra, seier festivalprodusent Jorid Lekve Eide. Billettsalet til utvalde arrangementet tek til 24. juni, og heile festivalprogrammet vert etter planen offentleggjort 2. juli.
Ulvik poesifestival
• Arrangert i Ulvik annakvart år sidan 2000
• Frå og med 2014 driv Nynorsk kultursentrum festivalen i regi av Olav H. Hauge-senteret
• «Grøn poesi» er temaet i år
• Festivalpass kroner 1300 gjeld for alle arrangement
• Billettsal frå og med tysdag 24. juni på www.poesifestivalen.no og ebillett.no
• Komplett program med over 20 arrangement vert offentleggjort onsdag 2. juli (©NPK)
