Språkmangfaldet her i landet blir vist i den nye dokumentarboka «Det fleirspråklege Noreg». Gjennom 30 portrett får vi eit innblikk i eit land der godt over 100 språk vert brukte kvar einaste dag.
I år er det språkår, og debatten om to- og fleirspråklegheit er godt i gang. Dette dokumentarprosjektet er hovudboka i Språkåret 2013 og viser eit samtidsbilete av språkbruken i den norske kvardagen.
Skribentar frå heile landet har møtt dei fleirspråklege nordmennene og fanga inn livshistorier og refleksjonane deira rundt det å leve med fleire språk.
Fotograf Oddleiv Apneseth har dokumentert den norske fleirspråklegheita på sin måte, og det faglitterære bidraget kjem språkforskar Øystein A. Vangsnes med i slutten av boka. Han set dokumentarprosjektet i eit større perspektiv, og gir fagleg innsikt i det språklege mangfaldet mange i Noreg lever med i kvardagen.
Boka er eit samarbeidsprosjekt mellom forlaget Skald og Språkåret, og prosjektet er støtta av Norsk kulturråd og Fritt Ord. (©NPK)
