Hokjønn er på veg ut av dialektane, i alle fall dei nordnorske.
Språkforskarar ved Universitetet i Tromsø har sett nærare på bruken av hokjønn i dei nordnorske dialektane, og dei ser at hokjønn er på veg til å forsvinne i somme av desse. Uttrykk som «klokka min» er ikkje grammatikalsk korrekte, men blir brukt i nokre av dialektane.
– Variasjonane i til dømes Nordreisa, Hammerfest eller Kirkenes er interessante. Det betyr ikkje at nokon har rett eller feil, men variasjonen er spennande, seier forskarane Åse Mette Johansen, Phillipp Conzett og Hilde Sollid ved Universitet i Tromsø til NRK Nordland.
Hokjønnsformer ser ut til å forsvinne særleg i område kor norsk har tett kontakt med kjønnslause språk som samisk, og det har vore mykje stigmatisering og negative haldningar knytte til nordnorsk talespråk, meiner forskarane. Dette ønskjer dei no å sjå nærare på.
– Dialektane har ein stolt brukarskare bak seg. Dei er stolte av dialekten sin. Det er nok noko av faktoren som forklarar kvifor eit slikt fenomen framleis eksisterer. Folk synest dialekten fungerer og er stolte av det, seier professor Hilde Sollid.
