Barn som ikkje har norsk som morsmål, får ikkje den opplæringa dei har krav på i barnehagen. Verst er det utanfor dei største byane.
Barnehagane på bygda har ofte få barn med minoritetsspråkleg bakgrunn. No viser det seg at dei også har lite fagleg kompetanse i fleirkulturell pedagogikk, skriv Forskning.no.
Berre tre prosent av pedagogiske leiarar og styrarar i kommunar med færre enn 40.000 innbyggjarar har formell utdanning i fleirkulturelle emne, viser ei undersøking gjort av forskar Camilla Eline Andersen ved Høgskolen i Hedmark.
– Eg møter ofte ei haldning om at det ikkje er det same behovet for utdanning i fleirkulturell pedagogikk på mindre stader, seier Camilla Eline Andersen til Forskning.no.
Andersen meiner fråværet av minoritetsspråka i den pedagogiske praksisen som vert rapportert inn, er slåande. 83 prosent av styrarane rapporterer at ingen av dei fleirspråklege barna får tospråkleg assistanse av tospråkleg personale.
– Det som vert gjort i mange barnehagar i dag, reflekterer ikkje dei verdiane og det mandatet som offentlege dokument uttrykkjer. Svært få fleirspråklege barn får tospråkleg assistanse av tospråkleg personale, seier ho. (©NPK)
