Trollkrittet er NBUs (Norske barne- og ungdomsbokforfattarar) debutantpris og går til ein lovande barne- eller ungdomsbokdebutant. I år går prisen til Therese Garshol Syversen for ungdomsromanen «Sting».
Dette er fyrste gong ei bok på nynorsk vinn prisen sidan den blei oppretta i 2011, skriv Samlaget. Prisen er på 25.000 kroner og vinnaren får også eit diplom laga av illustratør og forfattar Stian Hole. Juryen er det litterære rådet i NBU.
Namnet Trollkrittet er henta frå boka ved same namn av Zinken Hopp frå 1948
I «Sting» tek Garshol Syversen opp korleis ein kan halde ut det som ikkje er til å halde ut. Boka er ein sterk roman om minne, vald og om korleis ein på nytt kan finne lys i alt det som er mørkt. (©NPK)
