På nettportalen Mi sak kan du ta opp saker du meiner kommunen eller fylkeskommunen bør vere opptatt av. Får du samla nok underskrifter til di sak, må kommunen behandle ho.
Denne retten til å få saker på det politiske bordet viss mange nok vil det har eksistert lenge, men er lite nytta. Med portalen Misak.no håpar no kommunalminister Liv Signe Navarsete at fleire innbyggjarinitiativ vil bli høyrde.
– Eg vonar og trur misak.no kan få fram gode saker som fortener å bli tatt opp og diskutert i kommunestyret. Eg har tidlegare oppmoda rådmenn og kommunepolitikarar til å handsame initiativ frå innbyggjarane godt og grundig, seier Navarsete.
Alle kan reise kva saker som helst på nettportalen, men skal du ha nokon sjans å nå gjennom må du skrive om saker frå den kommunen du bur i, det same gjeld for å få skrive under. Det du bed om må vere ein del av oppgåvene kommunen og fylkeskommunen jobbar med. For at saka di skal bli tatt vidare må du få underskrifter som tilsvarar 2 prosent av innbyggjartalet i kommunen din eller minst 300 for saker på kommunenivå og 500 for fylkeskommunen.
