175 små daglegvarebutikkar i distrikta får no investerings- og utviklingstilskot for å sikre vidare drift.
I 2010 sette Kommunal- og regionaldepartementet av 15 millionar kroner til å styrkje små daglegvarebutikkar i distrikta. Etter hard konkurranse mellom søkjarane blir pengane no fordelte på 175 butikkar.
– Eg veit at nærbutikken er viktig for mange lokalsamfunn. Butikken som møteplass og tenesteleverandør i eit bygdesamfunn kan ikkje overvurderast, det er sjølve limet i bygda. Det er difor svært gledeleg at så mange har søkt, og dermed vist at det er mange engasjerte butikkdrivarar som vil satse, seier kommunal- og regionalminister Liv Signe Navarsete.
Kommunal- og regionaldepartementet har sett av 15 millionar kroner til det same tiltaket i 2011. (©NPK)
