Over 90 prosent av førsteklassingane i Bø i Telemark vel bokmål framfor nynorsk. Og politikarane er splitta i synet på å gjere kommunen språknøytral.
Berre seks av sytti førsteklassingar vel nynorsk i Bø, og ei undersøking NRK har gjort viser at halvparten av dei politiske partia i kommunen går inn for å gjere kommunen språknøytral.
Senterpartiet, KrF, Høgre og Frp meiner alle det er ein naturleg konsekvens av utviklinga i kommunen å la folk sjølv velje om dei vil bruke nynorsk eller bokmål.
Leiar i Bø mållag Margit Ims meiner det er overraskande at Sp og KrF går inn for språknøytralisering.
– For dei har ein ganske offensiv språkpolitikk som støttar nynorsk nasjonalt. Og då er det spesielt at dei, i ein nynorskkommune som Bø, går på tvers av dette. (©NPK)
