Erling Lægreid døydde brått og uventa fredag morgon. NRK-journalisten og nynorskmannen blei 72 år gammal.
Lægreid blei fødd 5. september 1939, og vaks opp på Årsdalstangen i Sogn og Fjordane. Han jobba mellom anna i Barne- og ungdomsavdelinga og var programleiar i Ungdommens radioavis, Flimra og Søndagsavisa. Han var med på å etablere radioprogramma Ekko og Dagsnytt 18.
Lægreid var i NRK frå 1970 til han gjekk av med pensjon i 2009. Dei siste åra hadde han ei fast spalte i Dag og Tid der han skreiv om menneske han hadde møtt. Nokre av desse tekstane vart samla i boka Nærgåande skisser som kom ut på Samlaget i år.
– Han køyrde sitt eige løp og ga blaffen i om folk likte det eller ikkje. Han var ein vestlending av det robuste slaget, seier Åsulv Edland, som jobba saman med Lægreid sidan 70-talet til NRK Sogn og Fjordane.
Andre kolleger av Lægreid omtalar han som ein kulturpersonlegheit og ivrig nynorskmann, ei urokråke og ein institusjon i NRK.
LNK.no skreiv sist om Lægreid då han var med i målformdebatten i Valdres for nokre veker sidan.
