Hillestad AS frå Dølemo i Aust-Agder får den nasjonale bygdeutviklingsprisen til Innovasjon Noreg for 2012.
Torsdag delte statsråd Trygve Slagsvold Vedum ut prisen på 250 000 kroner under messa Internationale Grüne Woche i Berlin. I grunngjevinga for prisutdelinga blei Hillestad kalla eit prakteksempel på ei familiebedrift i distriktet som har bygd stein på stein og oppnådd stor suksess.
Hillestad feriesenter, Hillestadsmykker og Hillestad Galleri er dei viktigaste pilarane i bedrifta. I dag er det tolv fulltidstilsette i verksemda, noko som gjer Hillestad til ein av dei største arbeidsplassane i Åmli kommune.
Bygdeutviklingsprisen blei etablert i 1997 for å synleggjere og inspirere vellukka nærings- og forretningsutvikling i og i tilknyting til landbruket.
Hillestad AS gjekk av med sigeren framfor Laagen Gulrot AS frå Vestfold, tomatprodusenten Jan Terje Vignes frå Rogaland og Rørosmeieriet frå Sør-Trøndelag. (NPK)
