Heim Nyhende Får Storeguten 2011 for god nynorskbruk

Får Storeguten 2011 for god nynorskbruk

NRK-journalist Astrid Brekken (68) får Storegutprisen 2011 for sin bevisste og gode bruk av nynorsk i det offentlege rom.

Brekken får utdelt Storegutprisen under Litteraturdagane i Vinje i september, kan Vest-Telemark Blad fortelje.

Astrid Brekken er journalist og forfattar, og har gjennom mange år markert seg som journalist i samfunnsengasjerte program i NRK Radio.

– Det var ikkje vanskeleg å kome fram til Brekken som vinnar av Storegutprisen 2011. Ho har lege i vasskorpa lenge, og det var eit enkelt val for oss. Ho brukar nynorsk på ein god, medviten måte, og språket hennar er lettforståeleg og ujålete, seier Olav Vesaas i prisnemnda til Vest-Telemark Blad.
Prisvinnaren kjem frå Lesja, og gudbrandsdalsdialekta ligg derfor i botnen for nynorsken hennar.

– For meg har det aldri vore snakk om noko anna enn nynorsk. Å spørje meg om kvifor eg brukar det er som å spørje kvifor eg vart fødd på Lesja. Nynorsk er sjølvsagt for meg, uttalte Brekken i eit intervju med NRK då ho fekk Kulturdepartementet sin nynorskpris for journalistar i 2010.

Brekken har arbeidd i NRK sidan 1971. Straks ho blei tilsett i rikskanalen byrja ho å lage radioprogram om det som då var svært kontroversielle tema, som sjølvbestemt abort, EF(EU)-medlemsskap, likestilling og politisk mobilisering av kvinner.

Kvinnesak og likestilling har lenge vore viktig for Brekken. På 70-talet kom ho med i kvinnerørsla, og ho sat i fleire år i redaksjonen til feministbladet Sirene. Gjennom heile karrieren sin har ho vist eit stort samfunnsengasjement, noko nemnda la vekt på då valet fall på NRK-journalisten.

– Astrid Brekken er ein medviten språkbrukar som gjennom arbeidet sitt har levert viktige innlegg i samfunnsdebatten, skriv dei i grunngjevinga si.

– Ho markerte seg med ein gong ho starta å arbeide i NRK. VI er opptekne av at Storegutprisen ikkje berre skal gå til dei som brukar nynorsk i litteraturen, men i heile det offentlege rom, understrekar nemndleiar Vesaas.

Storegutprisen blir utdelt under Litteraturdagane på Vinje 17. september.
Prisen går kvart år til «den eller dei som på ein positiv måte nyttar eit levande og ledig nynorsk», i følgje statuttane.
Styret i Litteraturdagane i Vinje er ansvarlege for utdelinga. Per i dag sit Olav Vesaas, Olav Nordstoga og Sondre Bratland i utdelingsnemnda.
Tidlegare prisvinnarar: Ivar Eskeland (2002), Berge Furre (2003), Ragnhild Sælthun Fjørtoft (2004), Bjørn Bø (2005), Sigmund Groven (2006), Liv Signe Navarsete (2007), Audun Svartdal (2008), Nina og Øystein Rudi (2009) og Odd Nordstoga (2010).

NYNORSK INSPIRASJON

Kurstilbod for skular og barnehagar

Arbeidet for å styrkja språkopplæringa i det offentlege er ei prioritert oppgåve for Landssamanslutninga av nynorskkommunar (LNK). Kursa våre blir administrerte og gjennomførte av Fretland...

Språklova: Dette er dei viktige paragrafane for nynorskkommunane

Frå og med 1. januar 2022 er nynorsk og bokmål formelt jamstilte og likeverdige språk på alle samfunnsområde. Formålet med lova er...

Har kommunen din levert høyringssvar om ny opplæringslov?

Arbeidet med ny opplæringslov er svært viktig for nynorskelevane og nynorskkommunane. LNK oppmodar alle medlemskommunane sine om å setja tydelege krav til...

Nytt samarbeid skal styrka nynorsken i barnehagane

Pirion og Sunnfjord kulturskule har laga til ei digital kursrekkje som skal hjelpa til med å styrkja nynorskarbeidet i barnehagane.

Seks fine julebøker på nynorsk

Mange skular og barnehagar bruker adventstida til høgtlesing kvar dag. Her får du tips til fleire gode bøker på nynorsk med god...

Vil gi utviklingsstøtte til fleire nynorske produksjonar i Den kulturelle skulesekken

Kulturtanken, Seanse, Høgskulen i Volda og fleire fylkeskommunar samarbeider om å få meir nynorsk i Den kulturelle skulesekken i ei heilt ny...

MEST LESE

Mellom appar og bærbare skjermar heve nynorsken mista sin heim

Kunnskapsdepartementet er asfalten nynorske løvetannbarn må sprenge seg gjennom. Alle norske elevar har lenge hatt rett til læremiddel på eige språk, men tida der eit...

Velkommen til landsting og 30-årsjubileum for LNK!

Me har gleda av å invitera dykk til landsting, årsmøte og 30-årsjubileum i Landssamanslutninga av nynorskkommunar. I år vert landstinget halde på Quality Sogndal...

– Den nye opplæringslova er ikkje god nok for nynorskelevane

Fredag 24. mars 2023 la Tonje Brenna fram forslag til ny opplæringslov. Norsk Målungdom synest det er fleire gode framlegg for nynorskelevane, men at...

Målblome til ålesundordførar Eva Vinje Aurdal

– Norske kommunar er viktige språkaktørar, og mellom 356 nyansar av kommunegrått har språket vårt både bøller og bestevener. Midt i det grå står...