119 fleire førsteklassingar i Rogaland har nynorsk som opplæringsmål i dette skuleåret. Andelen nynorskelevar aukar blant dei yngste elevane. – Eit lurt val! seier nynorskagent og lektor Trond Salte.
I ni kommunar i Rogaland har talet på førsteklassingar med nynorsk som opplæringsmål auka dette skuleåret. Det viser ferske tal frå Utdanningsdirektoratet. I Strand kommune har andelen nynorskelevar auka mest. Her har det blitt 49 fleire førsteklassingar med nynorsk dette året.
13 240 elevar har no nynorsk som opplæringsmål i Rogaland. Det utgjer 20,7 prosent av elevane i fylket. For dei tre yngste kulla i barneskulen har delen av elevane med nynorsk auka sidan sist skuleår. 21,9 prosent av førsteklassingane har nynorsk dette året, medan talet var 19,7 prosent førre skuleår.
Viktig val
Rogaland Mållag, Noregs Mållag og Landssamanslutninga av nynorskkommunar har gått saman for å styrka nynorsk i skulen i Rogaland. Lektor Trond Salte er prosjektleiar for prosjektet Meir mål i Rogaland. Han er godt nøgd med at fleire foreldre vel nynorsk for ungane sine.
– Det er veldig kjekke tal! Vel du nynorsk som opplæringsmål for barna dine, får dei mykje gratis. Solid forsking viser at opplæring i nynorsk gjev elevane ei betre språkleg forståing og auka språkleg medvit, og mange av dei same kognitive fordelane som andre tospråklege får. Er du språkleg sterk og medviten, har du eit godt utgangspunkt for å klara deg godt både fagleg og sosialt på skulen, seier Trond Salte.
Særleg ansvar for å fremja nynorsk
– Fleire skular og kommunar har jobba godt det siste året for å informera foreldre om fordelane med å gå i nynorskklasse, seier Trond Salte. Han minner òg om at språklova, som byrja å gjelda for fire år sidan, har gjeve alle offentlege organ eit særleg ansvar for å fremja nynorsk som det minst brukte skriftspråket.
Viktig å bygga språkleg sjølvtillit
I motsetnad til dei yngste elevane, er det fleire ungdomsskuleelevar som byter frå nynorsk til bokmål. På 10. trinn er det dette skuleåret 61 færre nynorskelevar enn sist skuleår. Nynorskdelen har gått ned frå 19 prosent til 17,8 prosent.
– Språkskiftet i løpet av ungdomsskulen og vidaregåande er ei utfordring. Me jobbar med fleire tiltak for å bremsa dette. Lærarane og skuleleiarane er svært viktige i arbeidet for å gje elevane språkleg sjølvtillit og nynorskkompetanse, avsluttar Trond Salte.
Her er kommunane i Rogaland der talet på nynorskelevar på 1. trinn aukar:
Strand: + 49
Sauda: + 21
Hå: + 17
Klepp: + 16
Stavanger: + 13
Gjesdal: + 12
Sola: + 10
Bokn: + 7
Suldal: + 6
