Det siste året har lokalpolitikarane rundt om i landet vorte meir positive til ei kommunereform og ei samanslåing av kommunane.
Det går fram av den store lokalpolitikarundersøkinga som Kommunal Rapport har gjort om mellom anna kommunereform og – samanslåing. Nesten 3.000 av dei lokale folkevalde i Noreg har svart på undersøkinga.
I undersøkinga svarer 62 prosent at dei meiner Stortinget bør gjennomføre ei kommunereform som gir færre og større kommunar. Dette er ein oppgang på fire prosentpoeng frå for eitt år sidan. Rundt 56 prosent seier også ja til å slå saman sin kommune med éin eller fleire nabokommunar.
Sterkast har støtta auka blant dei borgarlege. Aller størst er auken i Kristeleg Folkeparti, som er på 16 prosentpoeng. I Høgre, Framstegspartiet og Venstre har støtta auka med rundt 10 prosentpoeng til over 80 prosent.
Utviklinga er i tråd med ønska til både regjeringa og samarbeidspartia. Regjeringa ønskjer eit breitt forlik om kommunereforma i Stortinget og vil i første omgang prøve å få kommunane til å slå seg saman utan «tvang». (©NPK)
