Etter terrorhandlingane sist fredag opplever no ungdomspartia at uvanleg mange ungdommar tek kontakt og vil melda seg inn i organisasjonen. Auken gjeld parti både på høgre- og venstresida , viser ei undersøking NRK har gjort.
Spesielt har AUF fått fleire nye medlemar dei siste dagane, men også Framstegspartiet sitt ungdomsparti merkar pågangen. – Ein ting som har gjort inntrykk på mange er statsministaren og ei rekkje andre personar sine utspel i kjølvatnet av tragedien, seier leiar i FpU, Ove Vanebo, til NRK.no.
I dagane som har gått etter terrorhandlingane har ei rekkje ungdommar stått fram og teke til ordet for meir openheit og meir demokrati.
Jo Saglie er forskar ved Institutt for samfunnsforsking, og er usikker på om straumen av nye medlemar likevel vil føre til høgare valdeltaking. – Det kan hende det som har skjedd kan få folk til å slutte opp om demokratiske prosessar. Men på ei anna side vil det bli lagt ein dempar på valkampen, og det vil mellom anna bli færre skuledebattar, seier Saglie til NRK.no
