Meir handlefridom til lokale offentlege etatar vil gjere dei meir effektive. Det meiner eit fleirtal i ei ny undersøking.
Det er Respons analyse som på oppdrag frå Akademikerne har stilt 1000 representative personar spørsmålet: Kva tiltak trur du vil gje best offentlege tenestetilbod?
Heile 42 prosent meiner at lokale offentlege etatar må få større handlefridom til å løyse oppgåvene sine. 37 prosent meiner det vil hjelpe om staten set klare mål for dei lokale tenestetilboda, medan 21 prosent svarar at dei ikkje er sikre.
– Eg er glad for at folk ser samanhengen mellom den lokale handlefridomen og kvaliteten på dei offentlege tenestene. Den danske produktivitetskommisjonen har tydeleg dokumentert at meir effektivitet i offentleg sektor krev meir ansvar og handlefridom for leiarar og tilsette. Eg føreset at den norske produktivitetskommisjonen kjem til same konklusjon når dei legg fram innstillinga si neste år, seier leiar Knut Aarbakke i Akademikerne i ein kommentar. (©NPK)
