150.000 bier produserer honning på taket av fylkeshuset i Hordaland.
– Det er svært kjekt at Hordaland fylkeskommune kan bidra til kortreist honning. Men det er og ein undertone av alvor. Vi er svært avhengige av bier til matproduksjon, seier fylkesvaraordførar Mona Hellesnes til Hordaland.no etter at den aller første fylkeskommunale honningen er servert.
Honningen er produsert midt i Bergen sentrum, på taket av fylkeshuset. Om lag 150.000 bier svermar rundt, med bustad i tre bikubar, og ein rekkevidde på tre kilometer i luftlinje. Fredag 25. april vart bikubane plassert ut, og tysdag 17. juni var den første honningen klar. Dette er eit prosjekt for å sjå korleis bier kan leve og produsere honning i ein by.
Løfte fram honningproduksjon
– Det kan verke som ein liten raritet, men vi treng ta vare på biene. Dette er eit symbol på korleis vi kan løfte fram honningproduksjon. Det er ikkje ein sjølvfølgje at alle frukthagar har bier, seier fylkesvaraordførar Mona Hellesnes.
– Ah, det var godt, seier fylkesvaraordførar Mona Hellesnes og prosjektleiar Karen Louise Nybø og smakar på honningen rett frå bikubane.
På glas og gjeve vekk
I løpet av to korte månader har dei fylkeskommunale biene alt produsert mange kilo honning.
– Vi er spente på kor mykje honning vi kan hauste. Honningen skal vi tappe på glas og bruke som gåveartiklar, vår eigen fylkeskommunale honning, seier fylkesvaraordførar Mona Hellesnes som har lært mykje om bier og honningproduksjon.
Bynært landbruk
Karen Louise Nybø ved regionalavdelinga til fylkeskommunen er leiar av biprosjektet og har engasjert birøktar Bjarte Tennfjord. Klima- og naturressurssjef Gudrun Mathisen synest prosjektet er svært spennande og interessant.
– Vi ønskjer å skape merksemd om bier. Byen er og eit økosystem. Her får vi bynært landbruk og kortreist snop, seier Gudrun Mathisen.
Birøktar Bjarte Tennfjord gjeter dei tre bikubane på taket av fylkeshuset.
Til analyse
Birøkter Bjarte Tennfjord sette ut biene i april og følgjer utviklinga tett. Utover sommaren kjem han til å hauste honning etter kvart som den fyller seg opp. Den første honningen skal han sende til analyse for å sjå kva den inneheld. Bikubane er plassert slik at dei har kort veg til dei store kastanjetrea i Lars Hillesgate. Men med ein radius på tre kilometer flyg biene både til Nygårdsparken, Nygård og Store Lungegårdsvann.
