Lom kommune gjekk frå slakt i Kommunepasset i 2002 til best i 2011. Grunnen er systematisk arbeid med omdømme.
Administrasjonssjef Ola Helstad i Lom kommune fortalde dette til Landstinget til Landssamanslutninga av nynorskkommunar, som går av stabelen torsdag og fredag på Gol i Hallingdal. Tema under landstinget i år er omdømmebygging i kommunane.
Evaluering i Kommunekompasset i 2002 var slik: «Lom kommune beskrives som en «kaotisk og konfliktsfylt» organisasjon med uklar rolleutøvelse, uklarhet i anvendelsen av fullmakter og uryddighet i saksbehandlingen».
– Me visste at me hadde dyktige fagfolk og gode tenester. Men me tok ikkje det inn over oss. Og me kommuniserte det ikkje ut, sa administrasjonssjef Ola Helstad.
– Me starta systematisk arbeid med balansert målstyring, stor fokus på rolleforståing og rolleansvar, og aktivt bruk av etablerte målingar med høg nytteverdi.
– Det er fort at du blir møtt med sutring, anklage om hersketeknikk og at ein ikkje får lov til å kome med kritikk når ein jobbar med omdømme. Me er ikkje der.
– Me satsa på kommunikasjon, endringskompetanse og omdømme.
Arbeidet har gitt resultat: I 2011 hadde Lom det høgste poengtalet på kommunepasset. Lom har også både toppa og vore heilt i teten av kommunebarometeret nokre år.
– Det me etterspurde i 2002 er blitt ein realitet, sa Helstad.
