Miljøvernministeren støttar Riksantikvaren i at delar av Odda smelteverk skal fredast.
Fredinga gjeld bygningar og konstruksjonar som syner hovudtrekka i produksjonen av karbid og cyanamid, frå mottak og transport av råstoff til det ferdige produktet.
– Eg er glad for at vi tek vare på denne viktige nasjonale og internasjonale industrihistoria. Eg set stor pris på det sterke engasjementet i Odda i denne saka. Dei ynskjer å trygge viktige kulturminne og legg til rette for ny bruk og utvikling, seier miljøvernminister Bård Vegar Solhjell (SV).
Riksantikvaren skal så snart som mogleg leggje fram alternative løysingar for verksemd i tilknyting til dei freda objekta. I tillegg skal det sytast for at dei freda objekta blir skikkeleg sikra.
Smelteverket spelte ei viktig rolle i utbygginga av den kraftkrevjande industrien og fabrikken gjev eit rikt bilete av nokon av hovudfasane i industriarkitekturen på 1900-talet. (NPK)
