Fritt Ord har denne sommaren støtta litteraturprosjekt i norske bibliotek som har som mål å stimulere til auka formidling av nynorsk litteratur.
Eit av prosjekta som fekk støtte var Nynorsk=Bynorsk som Ålesund bibliotek har tatt initativ til.
– Målgruppa for prosjektet er elevar i den vidaregåande skulen, målet er at desse skal forstå at nynorsk faktisk er eit godt bruksspråk, det er ikkje berre språket for naturskildringar og lyriske vendingar, seier biblioteksjef Mariann Schjeide.
Fritt Ord fekk inn totalt 93 søknadar til prosjektstøtte om formidling av nynorsk litteratur, 44 av desse fekk støtte. I Ålesund er dei godt nøgde med tilskotet på 50.000 frå Fritt Ord. Midlane vil bli brukt til å dekke reise og opphald for forfattarane.
– Det er også eit poeng for oss at forfattarmøta skal skje her i bibilioteket og ikkje på skulane, dei skal kome til oss for å få møte forfattarane i eit bok – og bibliotekmiljø, seier Schjeide.
Les meir om prosjektet i Ålesund i neste utgåve av LNK-avisa.
