Fylkesordføraren i Hordaland, Tom-Christer Nilsen (H), er positiv til fylkessamanslåing og meiner det er naturleg at Hordaland og Rogaland samarbeider tettare.
– Eg meiner det er ein veldig god ide at vi slår oss saman, seier han til Bergens Tidende i ein kommentar til at regjeringa fredag la fram stortingsmeldinga om kommunereforma.
– Den verkelege motoren i denne landsdelen er Hordaland og Rogaland. Dei to høyrer saman,seier Nilsen, som er klinkande klar på kva retning samarbeidet bør gå.
Også leiaren for kommunal- og forvaltningskomiteen på Stortinget, Helge Andre Njåstad (Frp), meiner mykje tyder på at Hordaland og Rogaland kjem til å slå seg saman.
– Når vi er på reise i Rogaland er dei veldig opptekne av dette, spesielt dei som bur nær fylkesgrensa, seier han.
Han meiner Sogn og Fjordane også bør vurdera situasjonen sin med tanke på eit tettare samarbeid mellom dei to andre vestlandsfylka i sør. Fylkesordførar Åshild Kjelsnes (Ap) i fjordfylket er derimot ikkje like begeistra.
– Primært har vi ei haldning om at vi vil halda fram som eige fylke, men vi avviser ingenting, seier ho til avisa. (©NPK)
