Hordaland, Rogaland og Sogn og Fjordane diskuterte målet for etablering, utvikling av tenester og oppgåver, økonomi og omstillingsavtale for tilsette.
– Vi er nøgde med forhandlingane så langt. Klimaet mellom partane er positivt og godt. Det er krevjande, men vi oppfattar at alle er konstruktive, rause, og opptatt av å finne gode løysingar til det beste for innbyggarane våre. Vi er sikre på at vi skal greie å jobbe fram eit godt avgjerslegrunnlag som kan leggje fundamentet for ein Vestlandsregion, seier dei tre fylkesordførarane Anne Gine Hestetun, Solveig Ege Tengesdal og Jenny Følling.
Samde om måla
Forhandlingsutvalet er samd om måla for etablering. Det gjenstår mindre justeringar før denne delen av intensjonsplanen er klar.
Forhandlingsutvalet har bedt om fleire analysar knytt til dei resterande tema, mellom anna for å sjå på moglege gevinstar og konsekvensar av ulike avgjersler knytt til disse momenta. Dette gjeld mellom anna økonomi, omstillingsavtale for tilsette og tenester og oppgåver i ein ny region. Forhandlingsutvalet diskuterte og etablering av fellesnemnd. Fellesnemnda får ansvar for det førebuande arbeidet med etableringa av ein ny region.
På veg
– Det er ein omfattande og viktig prosess som er i gong. På det noverande tidspunkt er det korkje mogeleg eller ønskjeleg å gå i detaljar. Det er for tidleg i prosessen, og i respekt for arbeidet som no pågår. Det ber vi om forståing for, men vi er på veg mot noko, seier dei tre fylkesordførarane.
Forhandlingane skal leie fram til ein felles intensjonsplan. Denne vil danne grunnlaget for etablering av ein ny Vestlandsregion samansett av fylka Hordaland, Rogaland og Sogn og Fjordane. Intensjonsplanen blir lagt fram til behandling i dei tre fylkestinga i oktober. I desember behandlar dei tre fylkestinga etableringa av ein ny region.
Held fram på Sola og i Førde
Forhandlingane held fram 1. og 2. september på Sola Strand hotell i Rogaland. Forhandlingane blir avslutta i Førde 14. og 15. september med mål om å bli samde om ein endeleg intensjonsplan.
