Folkemusikar Sigrid Moldestad får Medaasprisen 2016.
Sigrid Moldestad har sidan solodebuten i 2007, vore ei lysande stjerne på den musikalske himmelen. Ho har sine røter i folkemusikken og skriv på nynorsk og syng på si eiga dialekt.
– Som artist meistrar ho kombinasjonen av å vere ei sterk scene- og historieformidlar av både tradisjonelt og nyskapande materiale, seier leiar i Medaaspriskomiteen, Claus Sellevoll i ei pressemelding.
Han legg til at han er svært glad over å dela ut Medaasprisen til ein artist med fokus på dialekt, røter og tradisjonar, og som formidlar dette på ein unik måte.
Prisløna «taus»
Moldestad har frå før motteke Spellemansprisen to gongar, først med trioen Gamaltnymalt i 2005 og så med TAUS i 2007. I 2010 vart ho tildelt Fylkeskulturprisen i Sogn og Fjordane og kåra til «Årets Folkemusiker». Det same året tok ho i mot Folkelarmprisen, før ho i 2012 fekk «Vossajazzprisen og Hilmar Alexandersens musikkpris.I tillegg har ho mellom anna vore med i gruppa Spindel, kabaret-trioen Fjøgl og duoen Lareli med Gabriel Fliflet.«Med si særeigne stemme og sitt kraftfulle felespel er Sigrid Moldestad blitt ei av våre kjæraste folkemusikarar», heiter det i grunngjevinga til juryen.
Feirar folkemusikken
Sigrid Moldestad vert tildelt Medaasprisen på Den Nationale Scene i Bergen måndag 24. oktober, og Sellevoll lovar ein festkonsert av dei sjeldne.
– Moldestad skal mellom anna dela scene med Helge Jordal, Finn Tokvam, Mads Eriksen, Odd Erik Lothe og ei gruppe frå Fargespill, fortel Sellevoll. Han skal sjølv stå på scena saman med gjengen i Singel & Sand, som er haustsatsinga til Hordaland Teater. Torkjell Børsheim frå dansegruppa Frikar byr på dans til tonane frå Sigrid Moldestad si fele, og det er duka for ein festkveld med folkemusikken i høgsetet. Til å leia det heile er som vanleg Dag Lindebjerg på plass som konferansier.
Medaasprisen blir årleg tildelt ein utøvande kunstnar, som i Ivar Medaas si ånd tek utgangspunkt i lokale musikalske tradisjonar og som brukar eigen dialekt. Prisen vert delt ut under Medaaspriskonserten på Den Nationale Scene måndag 24. oktober 2016.
Medaasprisen er ein bronseplakett av Os-kunstnaren Arne Mæland og 20.000 kroner.
I fjor blei Herborg Kråkevik og Jon Eikemo tildelt prisen.
FAKTA OM SIGRID MOLDESTAD:
Sigrid Moldestad er født 19. juli 1972 på Breim i Gloppen kommune. Ho er ein norsk folkemusikar og songar som spelar fele og hardingfele, og som er utdanna ved Ole Bull Akademiet på Voss. Årets prisvinnar er ikkje berre ein framifrå tolkar og formidlar av folkemusikken, men ho har også som komponist eit heilt spesielt øyre for gode melodiar, noko som kler dei sterke tekstane i hennar utval. Med sitt eige originale uttrykk maktar Sigrid Moldestad å sy saman fleire musikalske sjangrar, som folkemusikk, pop, bluegrass og visesong til ein heilskap.
Sigrid Moldestad har sine røter i folkemusikken og skriv på nynorsk og syng på si eiga dialekt. Som artist meistrar ho kombinasjonen av å vere ei sterk scene- og historieformidlar av både tradisjonelt og nyskapande materiale. Med si særeigne stemme og kraftfulle felespel er Sigrid Moldestad blitt ei våre mest kjente og kjæraste folkemusikarar.
