Filosofen og samfunnsdebattanten Gunnar Skirbekk (75) er kåra til Årets nynorskbrukar 2013.
Skribekk får prisen for arbeidet med å fornye tenkinga om ein gyldig og framtidsretta opplæringspolitikk for nynorsk, og for slitesterk evne til å halde oppe nynorsk som eit smidig språk for tenking, heiter det i grunngjevinga frå styret i Nynorsk kultursentrum, og direktør Ottar Grepstad seier det å gje prisen til Gunnar Skirbekk er ein språkpolitisk kritikk av den nye læreplanen i norsk.
– Gunnar Skirbekk har stilt dei gode spørsmåla og argumentert tungt for kva slags skule Noreg treng og kva slags norskfag skulen treng, meiner Grepstad.
Prisvinnaren sjølv seier nynorsk er viktig for alle som bur her i landet, for å skjøne kva landet går ut på både språkleg og kulturelt.
– For hundre år sidan meinte mektige professorar i Christiania at det nye norske språket aldri kunne nyttast til vitskap og filosofisk tenking. I dag veit vi betre. Det er ein ekstra grunn til å feire Ivar Aasen og Språkåret no i 2013, seier ein glad prisvinnar.
Det er 14. gongen Nynorsk kultursentrum kårar Årets nynorskbrukar. Prisen blir tildelt personar eller institusjonar som har synt evne til å bryte med språklege og kulturelle konvensjonar om bruk av nynorsk, som gjennom sitt føredøme eller praktiske arbeid gjer det lettare å vere nynorskbrukar, eller som skaper større allmenn forståing for nynorsk. Prisen på 100 000 kroner skal delast ut under opninga av Dei nynorske festspela 27. juni.
