Landssamanslutninga av nynorskkommunar fyller 20 år i år.
Landssamanslutninga av nynorskkommunar blir 20 år i år, og føyer seg dermed fint inn i rekkja av jubilantar i språkåret.
– At jubileet vårt fell saman med språkåret passar oss veldig fint, då får vi ekstra merksemd kring språkspørsmåla, seier styreleiar Astrid Myran Årvik.
LNK vart stifta sommaren 1993 på Bryne, etter initiativ frå dåverande kultursjef i Bergen, Sigve Gramstad. Organisasjonen skulle bli eit nettverk og eit talerør for nynorskkommunane. LNK tel i dag 123 medlemer, og medlemene er kommunar, fylkeskommunar og interkommunale selskap og samanslutningar.
– Når du er blitt 20 år, så er du ikkje ein tenåring lenger. LNK er blitt vaksen, sterkare og meir innarbeidd, seier styreleiar.
– Vi har eit stabilt medlemstal og vi har bevist at vi har livets rett.
– Og sjølv om organisasjonen har jobba i 20 år med å skape positive haldningar til språk og kultur, så er det framleis bruk for oss, seier Myran Årvik.
LNK ønskjer å halde språkdebatten varm og legg derfor opp til ei 20-årsmarkering i form av eit større ordskifte utpå vårparten.
Du kan lese meir om LNK i 20 år, kva organisasjonen har betydd for kommunane og kva dei skal jobbe med i framtida i LNK-avisa som kjem i veke 12.
