– Dette er ein stor siger for nynorskbrukarane og nynorskrørsla – og ein stor siger for regjeringa og stortingsfleirtalet som utfordra Google og andre gigantar med å lovfesta krav til at skriveprogram i skulen skal støtta nynorsk, seier dagleg leiar i Nynorskkommunane (LNK), Svein Olav B. Langåker.
Frå hausten av, når den nye opplæringslova blir innført, blir det eit krav om at alle skriveprogram som blir brukte i skulen skal støtta både nynorsk og bokmål. Ifølgje ei undersøking LNK har gjennomført, er det i dag mange skular som bruker skriveprogram som vil bli ulovlege å bruka dersom ikkje produsentane sjølv gjer endringar slik at programma følgjer offisiell rettskriving for både nynorsk og bokmål.
I dag kan fleire som skal bruker Google dokumenter og andre skriveprogram oppleva at dei får raude strekar under korrekt nynorsk og ingen feil der ein skriv feil.
Lovar å følgja lova
Sondre Ronander, kommunikasjonssjef for Google i Noreg og Finland, lovar no at tenestene til Google vil følgja lova.
– Våre tenester kjem til å oppfylla krava frå ny opplæringslov før skulestart, skriv han til LNK i ein e-post.
Lang kamp
Nesten éin av fire grunnskular bruker i dag mest Google sitt skriveprogram til skulearbeid. Mange skular og kommunar har vore usikre på om dei skulle byta til andre skriveprogram for å følgja lova.
108 ordførarar skreiv i 2021 eit brev til Google der dei bad om at mykje brukte program i skulen kom på nynorsk. Og gjennom fleire år har LNK og nynorskrørsla elles tatt til orde for å få inn eit krav om støtte for nynorsk i skriveprogram som er brukte i skulen.
