Stipendet på 150 000 kr blir delt ut for første gong i år.
Gunnhild Øyehaug er ein av dei fremste skjønnlitterære forfattarane i landet. Ho er fødd i Ørsta og busett i Bergen. Ho har sidan 1998 gitt ut ei rekke novellesamlingar, romanar og essaysamlingar. Ho har også skrive skodespel og gjendikta til nynorsk frå svensk, fransk og engelsk.
– Breidda i virket til Øyehaug gjer ho til ein viktig bidragsytar når det gjeld å formidle nynorsk på mange område og i ulike sjangrar. Ho har ein særeigen originalitet og utvidar handlingsrommet til nynorsken. Ein verdig vinnar av det første nynorskstipendet vi deler ut. Gratulerer!, seier fylkesordførar Jon Askeland i ei pressemelding frå Vestland fylkeskommune.
Det vart annonsert kven som får stipendet under møtet i fylkestinget 10. desember.
Utfordrar sjangrane
– Eg er overvelda av glede! Det er både viktig og rørande at Vestland fylkeskommune i det heile oppretta nynorskstipendet for å heidre Jon Fosse, og slik viser kor sterkt nynorsk står i Vestland. Det syner vilje til å støtte og løfte fram kunstnarar som nyttar nynorsk. At det vart meg som fekk det denne gongen, kan eg berre juble over og takke for. Det er ei stor ære. Tusen hjarteleg takk, seier Gunnhild Øyehaug
Bakgrunnen for nynorsksstipendet til Vestland fylkeskommune var tildelinga av Nobels litteraturpris for 2023 til Jon Fosse. Som heimfylke til Fosse vil Vestland heidre forfattaren og gjer det i form av dette stipendet.
Leikent og energisk språk
Gunnhild Øyehaug har også vore tidsskriftredaktør, litteraturmeldar, forlagskonsulent og er i dag skrivelærar ved Skrivekunstakademiet i Bergen.
Ho er kjend for eit leikent og energisk språk, som utfordrar både sjangrane ho skriv i og sjølve grensene for forteljinga. I tillegg til dikt, noveller, essay og romanar, har ho også skrive manus til filmen «Kvinner i for store herreskjorter» og omsett «Kristin Lavransdatter» av Sigrid Undset til nynorsk.
Det er eit kriterium at nynorskstipendet skulle gå til ein kunstar som nyttar nynorsk i arbeidet sitt som forfattar, dramatikar eller formidlar. Stipendet skal vere med og syne fram nynorsk som språk og kulturberar.
Det kom inn 59 nominasjonar innan fristen 15. september. Stipendet blir lyst ut på nytt i 2026.
