Neste veke held direktør Ottar Grepstad i Nynorsk kultursentrum sin siste årstale om tilstanden for nynorsk skriftkultur.
– Hausten 2008 bestemte eg meg for at 12 årstalar er nok. Eg ville slutte før dette berre blei
ein gamal vane. Onsdag kveld 26.september held han den siste talen som har fått tittelen «Draumen om målet».
Den viktigaste delen av den siste årstalen er det Grepstad kallar ein ny og moderne
argumentasjon for nynorsk.
– Det blir tenkt annleis om språk over heile verda i dag enn for berre få tiår sidan. Det bør også vise att i den norske språkdebatten, seier Grepstad. Han lovar ein tale fri for polemikk og eit forsøk på å gjere både nynorsk- og bokmålsbrukarar stolte over den språkdelte norske kulturen.
– Dessutan skal eg fortelje noko ingen har visst før, seier han i ei pressemelding.
I samband med årstalen lanserer Det Norske Samlaget boka «Draumen om målet. Tilstandsrapportar frå Norge og Noreg» der alle årstalane til Grepstad er samla.
– Talane er blitt haldne for å vise kor viktig nynorsk er, og har vore eit tiltak for å gjere Nynorsk kultursentrum til ein nasjonal kulturinstitusjon, seier Grepstad om bakgrunnen for årstalane som byrja i 2001.
Grepstad legg vekt på at han ikkje blir stille sjølv om det blir slutt med årstalar.
– Eg blir nok ikkje heilt stille etter dette. Råd og styre i Nynorsk kultursentrum skal leggje premissane for utviklinga av nye og uventa format i arbeidet med å hevde nynorskens rett og eigenverdi, seier Ottar Grepstad. Den drøftinga tek rådet til på alt dagen etter den siste årstalen.
