Skodespelar Frank Kjosås (32), sist sett som Fred i Halvbroren på NRK, har fått Hulda Garborg-stipendet for 2013.
Stipendet vart delt ut under årsmøtet i Samlaget torsdag kveld, og er på 10.000 kroner. Det vert delt ut annakvart år til skodespelarar som spelar på nynorsk.
– I hundre år har dei mange glimrande skodespelarane på Det Norske ved intelligent språkrøkt medvete bygd bru mellom bokmålsfolket og tilhengarane av nynorsken. Denne stolte tradisjonen fører årets vinnar vidare. Han er nynorskmann heilt ut (…) og er i dag ein sann riddar for målsaka, skriv juryen i grunngjevinga si.
Kjosås har vore tilsett ved Det Norske Teatret sidan 2006, og blant rollene hans trekte juryen særleg fram Judas Iskariot i musikalen «Jesus Christ Superstar» (2009) og den «saktmodige og tenksame Jesus» i maratonoppsetjinga av «Bibelen» i år.
Kjosås er fødd og oppvaksen i Øystese i Hardanger.
Blant dei tidlegare mottakarane er Svein Erik Brodal (2011), Hildegunn Riise (2009), Sverre Bentzen (2007) og Heidi Gjermundsen (2005) (NPK).
