Det pedagogiske prosjektet Kvitebjørnen er i innspurten av den femårige prosjektfasen.
No håpar ein at skulane skal sjå på prosjektet som ein ressursbase med fagleg innhald på nynorsk.
Utfordringa til Kvitebjørnen – undring og læring er å leve vidare etter pilotprosjektfasen og få fleire til å sjå på Kvitebjørnen.no som ein ressursbase for fagleg innhald på nynorsk.
– Me må få formidla til rektorar, lærarar, fagpersonell ved lærarutdanningsinstitusjonar og lærarstudentar at dette er eit opplegg som ligg klart til å bli nytta, seier prosjektleiar Astrid Eidhammer Hjelmeland.
Hjelmeland meiner opplegget vil passe perfekt som materiell til dei nye valfaga som grunnskulen tilbyr elevar frå og med 8. klasse.
– Me ser eit potensiale til å nå ut til lærarar som treng gode løysingar og opplegg for undervisninga i desse faga, slår Hjelmeland fast.
Mykje å hente
Det er lærar Egil Dolmen ved Sunnylven skule heilt samd i. Sunnylven i Stranda kommune er ein av 10 skular som deltek i Kvitebjørn-prosjektet.
– Her er det mykje å hente for lærarar på andre trinn også, det har absolutt potensial til å bli ein god ressursbase på nynorsk, seier han.
I haust rundar ein av prosjektet med eit pedagogisk opplegg for 10. trinn. Dette opplegget er utvikla av Trude Hoel, Sidsel Ødegård og Anne Grethe Aven. Temaet for opplegget er «Å forska på eige liv og lesing sett i samband med kompetansemål etter 10. trinn».
I forprosjektet til Rasmus Løland-markeringa 2007–2011 vart det gjort framlegg om å lage eit pedagogisk opplegg som kan få elevane til å reflektere over eige nærmiljø, kultur og lokalt næringsgrunnlag med tanke på eige engasjement og involvering.
Litterær refleksjon
Kvitebjørnen er ikkje primært eit leseprosjekt eller ei lesesatsing, men eit opplegg der ein nyttar Løland sine tekstar til å skape refleksjon og haldningar. I løpet av desse åra har elevane i tillegg til å bli kjende med forfattaren Rasmus Løland jobba med ulike metodar for å bli betre kjende med seg sjølve, sitt eige språk og sitt eige lokalmiljø. Dei har laga skodespel, jobba med forteljeteknikkar, laga utstilling med utgangspunkt i innovativ tenking, filosofert og laga kollasjar, teikneseriar og filmar om før og nå. LNK var ein av stiftarane bak Rasmus Løland-stiftinga. Det pedagogiske opplegget vil bli overlevert til Ryfylkemuseet (Lølandsenteret) etter at prosjektet er gjennomført.
