Det kan bli slutt på at Innovasjon Noreg er til stades for det lokale næringslivet i alle fylka.
I dag er Innovasjon Noreg til stades i alle fylke gjennom 15 hovudregionkontor og mange distriktskontor. Men no vil Nærings- og fiskeridepartementet at Innovasjon Noreg skal greie ut kva effektivitetsgevinstar ein kan få ved å endre den regionale kontorstrukturen.
Fylkeskommunane likar ikkje dette forslaget.
– Vi er for effektivisering, men vi reagerer på at departementet ber Innovasjon Noreg om å greie ut om kontorstrukturen utan at vi er spurde, seier Terje Stabæk, leiar for eigargruppa til fylkeskommunane til Nationen.
Fylkeskommunane eig 49 prosent av Innovasjon Noreg og løyvde 431 millionar kroner til regionkontora i 2014. Nedlegging av kontor vil gå ut over det lokale næringslivet, meiner fylka.
Divisjonsdirektør Per Niederbach i Innovasjon Noreg bekreftar at ei nedlegging eller samanslåing av kontor kan føre til at kunnskap om og kontakt med det lokale næringslivet går tapt.
– Vi må finne ut korleis vi skal kunne halde ved lag kunnskapen i ei framtidig organisering, seier han til avisa.
Statsbudsjettet som regjeringa legg fram til hausten vil vere avgjerande for om Innovasjon Noreg held på dagens kontorstruktur.
I ein e-post til Nationen skriv statssekretær i Nærings- og fiskeridepartementet Dilek Ayhan (H) at gjennomgangen av Innovasjon Noreg er ein del av forenklings- og effektiviseringsarbeidet til regjeringa. (©NPK)
