Jon Fosse-arkivet er klart til bruk. Fredag 10. september opnar arkivet i Ivar Aasen – tunet, skriv Vikebladet.
Same dagen får Jon Fosse Den internasjonale Ibsenprisen. Mellom gjenstandane i arkivet er ein paraply som Fosse har brukt.
– I dag er dette ein heilt vanleg paraply, men det er det ikkje om femti år, seier direktør Ottar Grepstad i Ivar Aasen-tunet.
Han opplyser at materialet førebels berre er grovsortert, men at interesserte no kan finne mykje av det dei er ute etter.
Nynorsk kultursentrum arbeider saman med Det Norske Samlaget og Det Norske Teatret om å få til eit permanent Jon Fosse-arkiv. Inntil vidare er arkivmaterialet plassert i Ivar Aasen-tunet.
– Førebels er Jon Fosse-arkivet berre eit provisorium. Kvart år søkjer vi om midlar frå Kulturdepartementet for å kome vidare med planane, og det held vi fram med til vi lykkast, seier Ottar Grepstad til Vikebladet.
