NRK vil no kartlegge kor mange nynorsbrukande journalistar dei har.
Kartlegginga er meint å vere eit ledd i arbeidet med å få opp nynorskprosenten i NRK. Resultatet skal leggast fram under seminaret om Mangfald i NRK i Førde 1. september.
– Me må erkjenne at me har eit arbeid å gjere før me når målet om 25 prosent nynorsk i NRK, seier kringkastingssjef Hans – Tore Bjerkaas til lnk.no.
Han legg vekt på at prosentkravet er krevjande, men at det bør vere mogleg å nå.
– Veit du om det er spesielle avdelingar som treng eit løft?
– Det trur eg, men eg vågar ikkje å konkretisere det. Men det er også noko me håpar å finne ut med denne kartlegginga, slår Bjerkaas fast.
Difor vil no NRK skaffe ei oversikt over kor mange nynorsbrukande journalistar dei har. Deretter er det i føglje Bjerkaas viktig å finne ut korleis ein kan få tak i fleire journalistar som brukar nynorsk. Han trekk også fram Nynorsk Mediesenter i Førde som eit godt tiltak for å stimulere til meir nynorsk i redaksjonane.
– Det er ein god stad for rekruttering der studentane kan søkje jobb direkte i NRK.
Spørjeskjemaet gjekk ut 13. august, og vart sendt til 2000 personar.
