Venstre og Framstegspartiet er dei einaste partia på Stortinget som ikkje har programmet sitt på nynorsk, melder avisa Sunnhordland.
Venstre hadde målsaka som ein av sine viktigste saker då partiet starta opp for 125 år sidan. No kan dei berre skilte med nynorsk nettutgåve av hovudbrosjyren, medan programmet deira berre kjem på bokmål.
Partiet beklagar dette til avisa Sunnhordland, men kan ikkje gje noka forklaring på kvifor det har blitt slik.
Framstegspartiet forklarar sitt manglande nynorsk-program med at dette ikkje er ei problemstilling for partiet, og at etterspurnaden etter program på nynorsk ikkje har vore stor.
Senterpartiet har løyst utfordringa med å ha delar av programmet på nynorsk og delar på bokmål. Dei andre stortingspartia har ifølgje avisa eitt for kvar målform.
