Kjersti Kildahl (52) frå Bergen er tilsett som dagleg leiar ved Olav H. Hauge-senteret i Ulvik. Ho tek til i stillinga 1. juni.
– Aldri før har ei stillingsutlysing snakka så direkte til meg, seier Kildahl i ei pressemelding i dag. – Med det gode arbeidet som alt er gjort, er det ei ære å få vere med og utvikle denne viktige kulturinstitusjonen vidare.
– Kildahl kjem til Hauge-senteret med robust røynsle som leiar og utoverretta formidlar. Vi gler oss stort over at ho har takka ja, seier direktør Ottar Grepstad i Nynorsk kultursentrum. Seks personar søkte på stillinga.
Bakgrunn frå Voss og Ålvik
Med foreldre frå Voss voks Kjersti Kildahl opp i Ålvik og tok examen artium ved Øystese gymnas i 1980. Utdanna siviløkonom frå Noregs Handelshøgskule i 1984 gjennomførte ho i 2008 Solstrand-programmet for leiarutvikling.
Kildahl har arbeidd som bedriftsrådgivar, nestleiar i økonomitenesteavdelinga ved Skattefuten i Hordaland og konsulent i Deloitte & Touche i Bergen. Frå 2001 til 2011 var ho kommunikasjonssjef i Bergensområdets interkommunale renovasjonsselskap (BIR). Ho kjem no frå stillinga som kommunikasjonsansvarleg i Avfall Norge. Kildahl er styremedlem i Nattjazz Bergen frå 2010 og i Bergen Dansekompani frå 2011.
Snart stilling nr. 3
Frå før arbeider Eirik Bergesen Dalen som dokumentasjonsansvarleg ved Hauge-senteret. Stilling nr. 3 blir lyst ut med det første. – Vi treng ein administrasjonssekretær, og den medarbeidaren skal Kildahl vere med og tilsetje, seier Grepstad. Mari Olafson Lundemo har siste arbeidsdagen som dagleg leiar 30. mars, og fram til Kildahl er på plass, fungerer Grepstad i stillinga.
Olav H. Hauge-senteret har eit driftsbudsjett for 2012 er på 3,1 millionar kroner utanom funksjonar som blir dekte av fellesfunksjonen i Nynorsk kultursentrum.
