Det er framleis høve til å melde seg på Fjordvegen Diktarvegen sin Diktarvegkonferanse på Hotel Ullensvang i Lofthus i Hardanger 20. – 22. mars.
Våren 2011 vart prosjektet Diktarvegen og selskapet I/S Fjordvegen einige om å slå seg saman i eit nytt aksjeselskap. Selskapet arbeider for å gjera Rute 13 (Rv 13) kjend, betra vegstandarden, og samstundes skaffa trafikk og besøkande til kulturarrangement og kulturorganisasjonar/selskap langs vegen.
Samarbeid
Diktarvegkonferansen 2012 har som tema å peika på strategiar for korleis det nye selskapet skal arbeida og samstundes bidra til å ”selja inn” ideen og det nye selskapet til aktuelle samarbeidspartar. Konferansen vil handla om korleis vi gjennom eit samarbeid mellom kultur, næring, kommunikasjon og offentleg forvaltning kan skapa eit nettverk som kan løfta fram Rv 13, identiteten til vegen, kulturen og opplevingane langs vegen, slik at kvalitetane og moglegheitene den byr på blir allmenn kjende.
Vestlandsrevyen
Både statsråd, politikarar, kunstnarar, forfattarar og fleire andre kjem til konferansen. Det heile startar med ein innhaldsrik kulturkveld på hotellet tysdag kveld, med utdrag frå Vestlandsrevyen II og konsert med Sigrid Moldestad, og vert avslutta torsdag ved lunsjtider med den kjende svenske kulturentreprenøren Putte Svensson Sahlin.
Innimellom dette handlar konferansen om å sjå Fjordvegen Diktarvegen frå ulike vinklingar og kvifor denne måten å tenkja på er ein vinn – vinn situasjon for alle.
