Det er reaksjonar på at tilsette i søppelselskapet IATA får skrive på den målforma dei ynskjer.
Kontormedarbeidar Irene Homme vil ikkje at ho og kollegene skal ha full valfridom når det gjeld målform; ho vil ha reglar om at det interkommunale selskapet skal bruke meir nynorsk enn dei gjer i dag, skriv Varden.
Indre Agder og Telemark Avfallsselskap (IATA) var tidlegare ein solid nynorskbrukar, som køyrde gjennomført nynorsk i alt frå skilt til stillingsannonser. Selskapet fekk også Nissedal Mållag sin målpris i 2008.
Homme har no klaga saka inn til fylkesmannen, skriv Varden.
– Kan eg be om at fylkesmannen vurderer om Indre Agder og Telemark Avfallsselskap IKS lovleg kan fatte og praktisere Mållova på ein slik måte? Har det noko å sei kva målvedtak eigarkommunane har fatta, undrar Homme.
Dagleg leiar Roar Karlsen i IATA vil ikkje kommentere saka overfor Varden, men styreleiar Pål Kristiansen seier at han trur styret har gjort eit lovleg vedtak.
– Men fant ikkje noko som bandt oss på nokon måte. Saka blei tatt opp i styret etter eit initiativ frå ein tilsett. Me meiner me handsama det på ein grundig og seriøs måte, seier han.
