Samferdselsminister Magnhild Meltveit Kleppa (Sp) vil ha forslag frå næringslivet om investeringar i bygging av veg og jernbane.
I Noreg blir bygging av veg og jernbane i hovudsak finansiert gjennom offentlege løyvingar og bompengar, men Kleppa er open for å diskutere såkalla offentleg privat samarbeid (OP).
– Eg er interessert i ei breiare drøfting av finansiering av samferdselsprosjekt enn det eg sjølv har vore med i til no. Eg ser at her er det eit breitt engasjement over heile landet for å sikre fleire prosjekt, og eg vil ha drøfta om vi òg kan prøve ut andre modellar for finansiering, seier ho til Aftenposten.
Berre tre vegstrekningar i Noreg er bygd etter OPS-modellen. Det er E39 Klett–Bårdshaug, E39 Lyngdal–Flekkefjord og E18 Grimstad–Kristiansand. I utlandet er denne typen finansiering langt meir vanleg.
– Det blir viktig i denne debatten å evaluere dei tre prosjekta som er gjennomført, ytterlegare, seier Kleppa. (©NPK)
