62 av dei 430 kommunane i landet har ikkje ungdomsråd i dag, skriv Framtida.no.
Dette kjem fram frå ein rapport frå Norsk institutt for by-og regionforsking.
– Når det er lovpålagt å ha eldreråd i alle kommunar, så bør det òg vera ungdomsråd, seier Jannike Hovland, ein av representantane på Ungdommens nasjonalforsamling som gjekk føre seg for vel ei veke sidan til Framtida.no.
Instituttet legg i sin rapport vekt på at barn og unge har liten eller ingen innverknad på område som helsetiltak for ungdom, skule og utdanning. Rådgjevar i Barneombodet, Thomas Wrigglesworth seier også til Framtida.no at kommunane bør bli flinkare til å bruke ungdomsråda på fleire felt. Barneombodet har også saman med Barne – og ungdomsrådet i Oslo teke initiativet til Ungdommens nasjonalforsamling.
Rapporten viser også at dei saksområda som born og unge har mest innverkad på er kulturtiltak og oppretting av fritidsklubbar. To av tre kommunar meiner barne- og ungdomsråd eller ungdommens kommunestyre medfører auka interesse for lokalpolitiske saker blant born og unge, og like mange meiner organet gjer at saker blir betre førebudd før ei avgjerd skal fattast.
